occadmin 發表於 2019-8-20 09:59:17

晴報 - 吳博君患漸凍人症歷盡人情冷暖 全靠正能量太太撐住

晴報 - 吳博君患漸凍人症歷盡人情冷暖 全靠正能量太太撐住

「漸凍人症」原稱運動神經細胞基因變異(MND),身體會無故變得乏力,逐漸喪失自理能力,最後甚至會終生癱瘓。曾經是無綫綠葉的吳博君去年突然遇上這個陌生又可怕的病變,人生頓時一下子崩塌下來。「漸凍人症」在醫學上是不治之症,患者情況只會一路一路變差,不過博君沒有打算放棄,反而在太太的陪伴、朋友的支持下,他每日積極面對,瘦弱的身軀依靠強大的心靈去抵抗病情變壞。

熱愛演戲 18年演員生涯最終被裁員

吳博君於1978年從無綫藝員訓練班畢業,隨後順利入行,在多個劇集演出,大多數演的都是街坊、士卒等小角色,但他的臉孔對電視觀眾而言,定必非常熟悉。吳博君說:「一直演戲差不多18年,咩角色都會演,無所謂,做唔做到主角好講求運氣同際遇,我自己有一句名言經常勉勵自己,『角色無大小,演員有上下』,每個角色用心演就可以。我同期的藝員都有好多,湯鎮業、廖啟智、陳敏兒、魯振順、李成昌、艾威等等。」後來由於1997年金融風暴,經濟衰退,無綫決定大規模裁員節流,不幸的吳博君是其中一員,吳博君說:「當時當然會唔開心,呢份工作咁多年,自己做得不錯,而且好喜歡,但都要接受呢個現實。後來我去做麵包師傅,又做過紙紮店同運輸,就算我做運輸時被人認出,我都冇咩所謂,大家更加開心。」


朋友資助醫藥費 體會人間有愛

去年吳博君不幸患上漸凍人症,疾病在亳無預警下來襲,令吳博君心情大受打擊,他說:「由正常人突然病發,當初係好難以接受,慢慢手指、雙手和腳都逐漸開始冇力,好多醫生形容呢個病比癌症更麻煩,病發最後好可能完全癱瘓,就好似霍金先生一樣。自己單係想像,就已經覺得好可怕,但怕係冇用,始終都要面對。」吳博君直言西醫沒有藥物能夠減慢惡化的情況,他則定期接受中醫治療,不過醫藥費高昂,他跟太太直認經濟有一定的壓力,他說:「每個月嘅醫藥費同交通費加起來差不多9千多,接近1萬元,所以經濟都有壓力。」幸好,吳博君在圈中認識很多好友,發病後從不少朋友、前僱主和機構得到援助,他說:「幫忙我嘅人實在太多,好似『藝進同學會』嘅師兄弟姊妹,佢哋各自都捐錢幫我,演藝人協會都有幫我。我之前去做清潔嘅公司老闆,雖然我離開咗工作崗位,但佢答應我兩年內,每個月都會資助我醫藥費5千元,無條件,令我好感動。意想不到世界上會有咁好嘅人,我真係很幸運,世間上原來有咁美好嘅人。」


吳太太積極心態 望發放正能量

病榻上失去自理的能力,吳博君全靠太太照顧,每日要飲的中藥、特別的三餐餐單,都是太太一手包辦。吳博君跟太太同樣是足球迷,因欣賞球賽而認識,婚後齊齊飛到德國捧愛隊的賽事,成為他們美好的回憶之一,吳博君說:「太太真係好重要,我實在唔可以失去佢,生活上好多細節都要佢幫忙,坦白講,有她在太好,冇咗佢,我都唔知點算。上天的安排好奇妙,有個咁好嘅太太支持我,晚年能有如此嘅禮物,好難得、好感恩。我知道佢好辛苦,有時我想幫忙但都幫唔到,我惟有同佢講聲,好感激你!」他同太太沒有顧慮太多未來的事,但求生活中安穩地擁抱幸福就足夠,他說:「我希望我們能夠繼續過開開心心的日子,做簡單的事情就已經滿足,如她喜歡睇波,我們一起欣賞賽事,已經滿足了,看似很簡單,其實已是一種幸福。」


社會近日紛擾不安,吳博君明白大家都會傷心失落,但連沒法治療的病都可以積極面對的時候,他希望大家都跟他一樣愛惜生命。他說:「現今社會有好多事令大家灰心失意,希望大家唔好放棄自己。無論咩情況之下,唔好放棄自己,珍惜自己生命。雖然依家係艱難時期,但唔好放棄。」身旁的吳太不時為吳博君抹嘴、遞上中藥,又著緊整理丈夫的衣領,吳太的細心和溫柔,彷彿成為吳博君努力抗病的最大支持,吳太說:「我不覺得辛苦,我最辛苦係佢有時會唉聲嘆氣,開心嘅事係佢可以陪我一齊睇波,近排社會動盪,佢又陪我一齊鬧,我已經好開心。兩公婆面對唔開心嘅事,但我哋想將能量,負負得正,將正能量發放出去,畀MND病友或所有朋友知道,辦法總比問題多,呢個係我成日講嘅口頭禪,每人發放一丁點正能量,社會就自然會變好。」


頁: [1]
查看完整版本: 晴報 - 吳博君患漸凍人症歷盡人情冷暖 全靠正能量太太撐住